شب براءت کے فضائل و برکات

عنوان:	شب براءت کے فضائل و برکات
تحریر:	محمد رحمت حسین رضوی حنفی

اللہ تعالیٰ نے بعض راتوں کو خاص رحمتوں اور برکتوں کا ذریعہ بنایا ہے، جن میں شب براءت بھی شامل ہے۔ یہ رات گناہوں کی معافی، دعاؤں کی قبولیت اور تقدیروں کے فیصلے کی رات ہے۔

شب براءت میں تقدیر کے فیصلے

اس مبارک رات میں اللہ تعالیٰ زندگی، موت، رزق اور دیگر امور کے فیصلے فرماتا ہے۔

مرنے والوں کے نام لکھے جاتے ہیں: حضرت عطاء بن یسار رضی اللہ تعالیٰ عنہ فرماتے ہیں: اس رات میں مرنے والوں کے نام لکھ دیے جاتے ہیں (بہار شریعت، ج: 1، ح: 5، ص: 16، مکتبہ المدینہ)

رزق اور تقدیر کا تعین: شب براءت میں بندوں کے اعمال، رزق اور عمر کے فیصلے لکھ دیے جاتے ہیں۔ (تفسیر خزائن العرفان، الدخان: 4)

نامہ اعمال پیش کیا جاتا ہے: شب براءت میں گزشتہ سال کے اعمال اللہ تعالیٰ کی بارگاہ میں پیش کیے جاتے ہیں۔ (فتاویٰ رضویہ، جلد: 4، ص: 587)

شب براءت میں روزے کی فضیلت

نبی کریم ﷺ نے فرمایا: جب شب براءت آئے تو اس رات میں قیام کرو (عبادت کرو) اور دن میں روزہ رکھو۔ (مشکوٰۃ المصابیح، حدیث: 1305)

قضا نماز پڑھنے کا آسان طریقہ

اگر کسی کی نمازیں قضا ہو چکی ہیں تو سب سے پہلے فجر، ظہر، عصر، مغرب اور عشاء کی قضا ترتیب سے پڑھیں۔ اگر زیادہ قضا نمازیں ہیں تو ہر فرض نماز کے ساتھ ایک قضا نماز ملا کر پڑھیں تاکہ جلد مکمل ہو جائیں۔

مغرب کے بعد 6 رکعت نوافل کی فضیلت

نبی اکرم ﷺ نے فرمایا: جو شخص شب براءت میں مغرب کے بعد 6 رکعت نوافل پڑھے، اللہ تعالیٰ اس کے گناہ معاف کر دیتا ہے اور سال بھر رزق میں برکت عطا فرماتا ہے۔ (حیات اعلیٰ حضرت، جلد: 2، ص: 285)

سورۃ یٰسین کی تلاوت

جو شب براءت میں سورۃ یٰسین کی تلاوت کرے، اللہ تعالیٰ اس کی حاجات پوری فرماتا ہے۔ (فضائل درود و سلام، ص: 216)

اہم نصیحت

یہ مبارک رات عبادت، توبہ، ذکر و اذکار، قضا نمازوں اور نوافل کی ادائیگی میں گزارنی چاہیے تاکہ اللہ تعالیٰ کی مغفرت اور رحمت حاصل ہو۔

اللہ تبارک و تعالیٰ ہم سب کو اس مبارک رات کی برکتیں نصیب فرمائے۔ آمین بجاہ سید المرسلین ﷺ